Pou Ārahi Māori

**Pou Ārahi Māori - Te Pou Ohumahi Mātauranga**

“Whakatairanga ake ngā kete o te mātauranga ki ngā tōpito o te motu, o te ao whānui e”

Kei ngā pou kāhika o te ao Māori, tēnā koutou

E karanga ana a Te Tāhuhu o te Mātauranga ki ngā tono tūranga mahi a ngā mātanga, ngā pūkenga, ngā kaiārahi Māori rānei e ngākau nui ana ki te mātauranga, ā, e kōingo ana ki te whakahāngai tika i te pūnaha mātauranga mō ā tātou tamariki mokopuna. He tūranga rautaki tahi, mahi ngātahi hoki i te kāhui rangatira o Te Tāhuhu, Te Mahau, me Te Pou Ohumahi Mātauranga nei - hei Pou Ārahi Māori. Ka noho mai hoki ki te kāhui o ngā Pou Ārahi Māori, arā ngā manukura tokoiwa whakawhiti ana i Te Tāhuhu, e hāpai ana i ngā wawata nui o te Māori ki te mātauranga.

Ko tāna, he tautoko hoki i te hurihanga hou o te Te Tāhuhu me Te Mahau ki te tārai tika i te pūnaha mātauranga kia rangatira ai kia mana taurite anō ai ōna whakaputanga.

Ko tāna anō, he whakapakari i ngā pūkenga ahurea Māori o ngā kaimahi o Te Tāhuhu me Te Mahau, he whakatauira hoki i ngā tikanga me ngā tukanga Māori e whakamana ai te Tiriti o Waitangi.

Poipoia ngā mokopuna, ngā rangatira mō āpōpō Ko ā tātou mokopuna te aronga nui o ngā mahi katoa. Haere mai ki te āwhina, ki te whakatutuki i te whakamaunga o te kōrero mō ā tātou uri whakatupu e heke mai nei, e heke mai nei.

**Mō ēnei tūranga**

Ko Te Pou Tuarongo (ko te Māori Education Group i tōna wā), he rōpū whakapakari i Te Tāhuhu me Te Mahau kia whai mana ai ngā tū mahi me ngā tū kaupapa o te mātauranga ki te Tiriti o Waitangi. Ko te whāinga matua, he urungi i te Karauna me te ao Māori kia whakapuaki tika i ngā mātāpono o te kāwanatanga me te rangatiratanga. Ka mātua rā ki a Te Pou Tuarongo te tūhonohono i ngā wāhanga katoa o Te Tāhuhu me Te Mahau - kia tū Māori, kia tū rangatira ai tō tātou Whare o te Mātauranga, kia hāpai hoki i te angitutanga a te Māori ki tōna anō mātauranga.

Ka noho mai tēnei tūranga i raro i te mana whakahaere a te Hautū o Te Pou Tuarongo.

Ko Te Pou Ohumahi Matauranga te kapa o mua hei kōkiri i ngā rautaki me ngā ratonga hei whakapakari i ngā tikanga ohumahi katoa o te rāngai mātauranga tae atu rā ki ngā kaiako, ngā kaitautoko, ngā kaiāwhina anō hoki. Ka riro mā te rōpū nei ngā ratonga huhua pēnei i te whakarite i te putunga ohumahi ki ngā wāhi o Aotearoa e tika ana, i ngā wā hoki e hiahia ana. Ka mahi ngātahi i te rāngai mātauranga kei ngā kura, kei ngā kura kōhungahunga hoki. Ka hāpai anō i ngā tūhono tāngata e pūmau ana, e aro tōtika ana ki ngā hiahia me ngā wawata mātauranga o te tangata, o te hapori anō hoki. Ko ā mātou pātuitanga me te hunga whai pānga nei, ko ngā poari whakahaere kura, ko ngā kaimahi kura, ko ngā rōpū mātauranga, ko ngā rōpū uniana, ko ētahi atu rōpū tari kāwanatanga hoki. Ka whakahaerehia ngā ratonga matua mō te ohumahi mātauranga pēnei i te tari whai pūtea a ngā kaimahi. E ngākau ū ana mātou kia pakari ake ō mātou pūkenga ahurea, ō mātou āheinga hoki hei whakatutuki whakaarotau a te Kāwanatanga, hei whakamana hoki i ngā hapori me ngā tāngata e whai pānga ana ki ngā ratonga.

Ko tā mātou anō, he whakatinana pūnaha, he whakapakari whāinga mō te Matatū Aotearoa, te Amorangi Mātauranga Matua, me ētahi atu tari kāwanantanga. He mahi ngātahi hoki i ngā rōpū o Te Mahau, Te Pou Kaupapahere, Te Pae Aronui me Te Poutāhū. Ka mahi ngātahi mātou kia tū pakari nei te ohumahi kaiako ki te whakatinana i tētahi pūnaha mātauranga e whai rangatira ana, e mana taurite ana hoki. Ka mātai tonu mātou ki te whakatupu i te ohumahi mātauranga mā te whakamanea, te whakapupuri, te whakapakari anō i ngā kaimahi e ngākau titikaha ana ki te ahureitanga o ngā mahi whakaako me ngā wheako.

Ka noho mai te Pou Ārahi Māori mō Te Pou Ohumahi Mātauranga hei kaiārahi, hei kaitautoko, hei hoa arohaehae hoki mō te Hautū o Te Pou Ohumahi Mātauranga, e whakapakari ana i ngā pūkenga ahurea o te rōpū nei.

Ka noho mai tēnei tūranga i raro i ngā whakahaerenga o te Hautū Te Pou Ohumahi Mātauranga.

**Mōu ake**

Ko te Pou Ārahi Māori, he tangata e tohunga ana ki te ārahi tāngata, e ngākau titikaha ana ki te mātauranga, e mātau ana hoki ki te ao Māori - ki tōna reo me ōna tikanga. Ko te tikanga hoki, kua whai wheako mahi kei te pae o te Karauna me te ao Māori me ngā tūhononga ā-iwi anō hoki.

Kia angitu ai koe i te tūranga o te Pou Ārahi Māori mō Te Pou Ohumahi Mātauranga, ka whakaatuhia tō tohungatanga ki te ārahi, ki te rautaki, ki te tohutohu, ki te whakawhanake mahere whakapakari ahurea o te rōpū, ka mutu, ka hāpai i te aronga me ngā mahi whakahaere o Te Tāhuhu.

**Ka mau nei i a koe**:

- he tirohanga mātauranga Māori, mātauranga ā-Iwi
- he manawanui ki te ārahi kaimahi hei whakapakari pūkenga ahurea, pūkenga Māori
- he aronga auaha