Kaihautū Māori

**EDUCATIONAL ASSESSMENT RESEARCH UNIT**
**TE KURA ĀKAU TAITOKA | COLLEGE OF EDUCATION**

“E ngā kaiwhatu o ngā kete mātauranga,

Tēnei mātou e karanga atu nei ki a koutou.

Nau mai ngā pūkenga, nau mai ngā wheako,

Nau mai ōu koutou ngākau nui ki te ao mātauranga, ki te ao rangahau,

Whakakīia ai ngā kete ki te kōrero a tini, ki ngā moemoeā a mano,

Kia hangaia pai ai te ara mātauranga hei hikoi mā ō tātou tamariki, mā ō tātou mokopuna.”

Kei te kimi mātou i tētahi Kaihautū Māori e rumakina ana ki te ao Māori, e mārama ana ki te ao me ngā wawata o ngā whānau, o ngā hapū me ngā iwi, otirā, e kaha ana ki te tū i runga i te ngākau toa hei painga mō ngā tamariki Māori huri noa i te ao mātauranga.

Mā ōna pūkenga whai mana ka ārahi te Kaihautū Māori i ngā mahi rautaki me ngā momo wānanga kia auaha, kia whai tikanga, kia whai kounga, kia noho hoki te Māori ki te pūtake o ngā rangahau me ngā tāpaenga kōrero a te Rangahau i ngā Tirohanga me ngā Kokenga o te Marautanga. Ko te whāinga matua o te kaupapa, he whakaawe i ngā whakaaro e pā ana ki ngā momo pūnaha, he whakahaere, he whāngai hoki i ngā huringa nui ki te ao mātauranga e whai hua ai ngā ākonga Māori, ō rātou whānau, o rātou hapū me ō rātou iwi.

E whakamihi ana te rōpū e whai ana i ngā tirohanga hou me te kokenga whakamua o te marautanga i te ngākau ohaoha o te Māori i tōna tū hei kaiārahi, hei kaitautoko, hei kaiwhāngai hoki i ngā mahi rangahau ki Aotearoa me Te Waipounamu. Ka whakapau kaha te rōpū nei ki te whakaata atu i ngā wawata o ngā tamariki Māori, o ō rātou whānau, o ō rātou hapū me ō rātou iwi.

Ka tonoa te hunga e kaingākau ana ki te tūranga nei ki tētahi hui ki te rongo i ngā kōrero mō te kaupapa, ki te tūtaki i ngā hoamahi, ki te whai mōhiotanga anō mō te mahi, ā, ki te wānanga hoki i ō pātai.

**Ngā whakamārama mō te kaupapa**

Ko tā tēnei tūranga he whakarato arawātea ahurei ki tētahi kaiako, kairangahau tautōhito hoki/rānei hei ārahi i ngā mahi whakaihu waka o te whakaumu pūnaha. He wāhanga tēnei o ngā mahinga ngātahi i waenga i a Te Whare Wānanga o Ōtāgo me te Kaunihera Rangahau Mātauranga o Aotearoa (NZCER), otirā ko te pūtake o ngā mahi ko te hoahoa me te whakatinana i tētahi huarahi hou ki te kohi mōhiohio ā-pūnaha o ngā pānga o Te Mātaiaho, te Marautanga o Aotearoa hou. He mea tautoko tēnei rangahau e Te Tāhuhu o te Mātauranga, i raro i te ingoa o "te rangahau i ngā tirohanga me ngā kokenga o te marautanga".

Kua nui ake te mana o te Mātauranga Māori i roto i Te Mātaiaho, tēnā i roto i te Marautanga o Aotearoa 2007 (NZC). Me whakaata tēnei i roto i ngā aromatawai me te aroturuki pūnaha. Ko te tokomaha o ngā ākonga Māori kei roto i ngā kura e whakamahi ana i Te Marautanga o Aotearoa, ā, me whakarite tēnei rangahau kia whakaata ngā aromatawai me te aroturuki pūnaha i ngā wawata o ngā tamariki Māori, ō rātou whānau, hapū me ngā iwi.

“Whaowhia te kete mātauranga”

“Fill the basket of knowledge”

Ka whakawhānui tēnei i te Rangahau Aroturuki ā-Motu i te Paetae Ākonga (NMSSA). Ka whai wāhi tētahi hōtaka aromatawai nui, otirā ka haere te tira ki ngā kura āhua rua rau te maha i ia tau me te kohi raraunga hei aroturuki i ngā ia o ngā paetae ākonga. Kei roto hoki i te rangahau hou, nui ake hoki, ētahi waehanga tāpiri e rua. Ko te waehanga pūtoi, ka whaiwhai i ngā kokenga o ngā pūtoi ā-tau o te reo matatini me te pāngarau, me te Waehanga Rangahau Tere, arā he pae o ngā kura kakama, urupare hoki ki te kohi raraunga.

He mea nui tēnei mahi ki a Aotearoa me Te Waipounamu i te mea he aronga ahurei tō te rangahau ki te whakawhanake i ngā tirohanga ka whakamahia ki te whakamana me te tautoko i te whakapaitanga o te pūnaha. Ka uru ki tēnei ngā tūmomo tautoko mā ngā kaiako hei whakapai ake i ngā mahi ako.

Tēnā hono mai ki tētahi kaupapa mahi ngātahi i waenga i a Te Whare Wānanga o Ōtāgo me NZCER i a māua e hoahoa ana, e whakatinana ana hoki i tētahi huarahi hou ki te whaiwhai i te paetae ākonga ā-motu i raro i Te Mātaiaho.

Ka whakahaeretia e mātou he hui kia rongo ai koe mō te kaupapa, te tūtaki ki te rōpū me te ako i ngā kōrero mō te mahi nei.

**Ngā taipitopito**

He tūranga ukiuki tēnei. Ko te taumata utu o tēnei tūranga ko te $100,000 - $140,000 i te tau.

Ka noho te kaitono angitu hei mema o te rōpū o Te Whare Wānanga o Ōtāgo, ā, ko te painga atu mēnā ka mahi ia ki ō mātou tari ki Ōtepoti, te mahi rānei i te taha o ngā hoa rangapū o NZCER ki Te Whanganui-a-Tara.

**Te whakapuaki i tō aronga**

Hei whakapuaki i tō aronga ki tēnei tūranga, tēnā tukua mai he tauākī, atu ki te kotahi whārangi, ki te reo Māori. Kōrero mai ko wai koe, ā, he aha koe e aro nei ki tēnei tūranga.

Ka tonoa te hunga e kaingākau ana ki te tūranga nei ki tētahi hui ki te rongo i ngā kōrero mō te kaupapa